Sa pagitan ng serbisyo publiko at paglilingkod sa simbahan, tahimik na inihahabi ni Dennis Hernandez Purihin ang isang buhay na nakaugat sa katapatan at pananampalataya. Mula Lunes hanggang Biyernes, siya ay nagsisilbi bilang Ingat-Yaman ng Lokal na Pamahalaan ng Kawit, Cavite, isang tungkuling nangangailangan ng mataas na antas ng tiwala at integridad. Anim na buwan pa lamang siya sa posisyon, ngunit dala niya ang mahigit dalawang dekadang karanasan sa serbisyo publiko.
Tuwing Sabado at Linggo, makikita naman si Dennis sa Diocesan Shrine and Parish of the Most Holy Rosary, Reina del Caracol, kung saan siya ay nagsisilbing organista. Sa bawat pagtugtog ng organ, ang kanyang musika ay nagiging panalangin, isang alay ng pasasalamat at paglilingkod sa Diyos.
Si Dennis ay nagtapos ng Bachelor in Secondary Education major in English sa Western Colleges, Naic, Cavite, at nagpatuloy ng pag-aaral sa Philippine Christian University, kung saan niya tinapos ang Master’s degree in Public Administration major in Management. Para sa kanya, ang edukasyon ay mahalagang sandata upang higit na mapabuti ang kalidad ng serbisyo sa bayan.
Ang kanyang paglilingkod sa simbahan ay nagsimula noong 1999 bilang sakristan. Nang mangailangan ng organista, pinili niyang matuto at tumugon sa tawag. Isa sa mga awiting pinakamalapit sa kanyang puso ay ang “Tawag sa Paglilingkod,” na ayon sa kanya ay paalala na lahat ay tinatawag na maglingkod at gawin ito nang may buong husay at katapatan.
Bago italaga sa Kawit, 17 taon munang naglingkod si Dennis sa LGU ng Rosario. Buong pasasalamat niyang kinikilala ang mga taong naging bahagi ng kanyang paglalakbay, ang Diyos bilang pinagmumulan ng lahat ng biyaya, ang kanyang pamilya, at ang mga lider na nagtiwala sa kanyang kakayahan, kabilang sina Mayor Nonong Ricafrente, Mayor Voltaire Ricafrente, Mam Bamm Gonzales, at ang kanyang kasalukuyang mga pinuno na sina Mayor Cynthia Aguinaldo at Vice Mayor Angelo Aguinaldo.
Sa edad na 46, ang mensahe ni Dennis sa kapwa kawani at kabataan ay simple ngunit makabuluhan:
“Palaging maging tapat at magsipag sa trabaho. Darating din ang panahon ng pagkilala sa dedikasyon at galing.”
Ang kuwento ni Dennis Hernandez Purihin ay patunay na ang tunay na tagumpay ay makikita sa buhay na inialay sa tapat na paglilingkod sa pamahalaan man o sa simbahan. #END