Ni Sid Samaniego
Kawit, Cavite — Naging sentro ng panalangin, emosyon, at panawagan para sa katarungan ang Freedom Park sa Kawit, Cavite matapos na matagumpay na maisagawa ang ecumenical prayer rally para kay dating Senador Bong Revilla Jr. nitong Linggo ng hapon.
Mula alas-4 hanggang alas-6 ng gabi, libo-libong tagasuporta ang dumagsa sa naturang parke bitbit ang mga rosaryo, kandila, tarpaulin, at plakard bilang pagpapakita ng kanilang suporta at paniniwalang hindi umano naging patas ang mga prosesong dinaanan ng dating mambabatas. Ayon sa mga organizer, umabot sa humigit-kumulang 10,000 katao ang nakiisa sa pagtitipon.
Iba’t ibang panalangin mula sa magkakaibang sektor ng pananampalataya ang inialay sa rally, na nagbigay-diin sa kapayapaan ng bansa, katotohanan, at hustisya. Sa gitna ng programa, maraming dumalo ang hindi napigilang maluha habang sabay-sabay na nanalangin para sa kalagayan ni Revilla at ng kanyang pamilya.
Giit ng mga organizer, hindi ito isang political rally, kundi isang pagtitipon na nakatuon sa pananampalataya at pagkakaisa.
“Dasal ang sandata namin,” ayon sa isa sa mga lider ng grupo. “Naniniwala kami na sa tamang panahon, lalabas ang katotohanan.”
Isa sa pinakamalakas na mensaheng umalingawngaw sa rally ay ang panawagan para sa due process. Mariing iginiit ng kampo ni Revilla na hindi raw ito nabigyan ng sapat na pagkakataong marinig ang kanyang panig, lalo na sa mga pagdinig ng Independent Commission for Infrastructure (ICI) at ng Senate Blue Ribbon Committee.
Ayon sa kanila, hindi umano naimbitahan ang dating senador sa mga naturang pagdinig at bigla na lamang inilabas ang warrant laban sa kanya. Isang hakbang na, para sa mga tagasuporta, ay malinaw na paglabag sa karapatan ng isang akusado.
Makikita sa rally ang mga ordinaryong mamamayan, mga senior citizen, kabataan, at buong pamilya na nagsabing dumalo sila hindi dahil sa pulitika, kundi dahil sa paniniwala nilang dapat manaig ang patas na proseso ng batas.
Bagama’t walang opisyal na kumpirmasyon kung may dumalong malalaking personalidad mula sa pulitika o showbiz, naging sapat na raw para sa mga tagasuporta ang dami ng taong kusang-loob na nakiisa, bilang patunay na hindi nag-iisa si Revilla sa kanyang laban.
Sa pagtatapos ng programa, nanatiling mapayapa at maayos ang pagtitipon. Sabay-sabay na nag-alay ng huling panalangin ang mga dumalo, kalakip ang mensahe ng pag-asa na sa huli, katarungan at katotohanan ang mananaig.
Habang patuloy ang pag-usad ng mga isyu at kaso, malinaw ang isang bagay: para sa libo-libong dumalo sa Kawit, ang laban ni Bong Revilla ay hindi lamang usapin ng isang tao, kundi usapin ng tiwala sa hustisya at karapatan sa due process. #END