Ni Sid Samaniego
CAVITE – Personal na nagtungo sa burol ng 19-anyos na estudyanteng nasawi umano sa hazing ang Cavite Provincial Director na si Ariel R. Red upang iparating ang kanyang pakikiramay at tiyakin sa pamilya ng biktima na hindi titigil ang pulisya hangga’t hindi napapanagot ang lahat ng sangkot sa krimen.
Sa ulat ng Cavite Police Provincial Office sa ilalim ng Philippine National Police, naganap ang insidente sa lungsod ng Dasmariñas kung saan pinaniniwalaang sumailalim sa hazing ang biktimang estudyante bago ito isinugod sa ospital.
Ayon kay Col. Red, personal niyang binisita ang pamilya upang iparating ang taos-pusong pakikidalamhati ng buong kapulisan ng Cavite. Kinausap din niya ang mga kaanak ng biktima at tiniyak na masusing iniimbestigahan ang kaso upang matiyak na mabibigyan ng hustisya ang pagkamatay ng binata.
“Hindi namin hahayaan na manatiling walang pananagutan ang mga taong nasa likod ng insidenteng ito. Gagawin ng kapulisan ang lahat ng kinakailangang hakbang upang mahuli at mapanagot ang lahat ng may kinalaman sa pagkamatay ng biktima,” pahayag ng opisyal.
Sa kasalukuyan, nasa kustodiya na ng pulisya ang isa sa mga suspek na umano’y nagmaneho ng sasakyan na naghatid sa biktima sa ospital matapos ang sinasabing hazing rites. Ayon sa mga awtoridad, kusang-loob itong sumuko at umamin sa kanyang naging papel sa pangyayari.
Patuloy naman ang pagtutok ng mga imbestigador sa iba pang posibleng sangkot sa insidente habang kinakalap ang karagdagang ebidensya upang matukoy kung sinu-sino pa ang dapat managot sa pagkamatay ng estudyante.
Samantala, kasama ni Col. Red sa pagdalaw sa burol ang hepe ng pulisya ng lungsod ng Dasmariñas na si Resty Soriano. Nakiramay din ang mga opisyal sa pamilya at tiniyak na hindi nila pababayaan ang kaso.
Muling pinaalalahanan ng kapulisan ang publiko tungkol sa mahigpit na pagpapatupad ng Anti-Hazing Act of 2018 na naglalayong sugpuin ang mga marahas na initiation rites sa mga fraternity at organisasyon.
Habang nagluluksa ang pamilya ng biktima, umaasa ang mga ito na makakamit ang hustisya para sa kanilang mahal sa buhay na nasawi sa isang ritwal na matagal nang ipinagbabawal ng batas.
Patuloy naman ang panawagan ng mga awtoridad sa iba pang saksi na lumantad at makipagtulungan sa imbestigasyon upang tuluyang mabigyang-linaw ang trahedyang ito. #END