Ni Sid Samaniego
CAVITE — Pormal nang binuksan at binasbasan nitong Lunes ng umaga, Marso 9, ang bagong Public Burulan sa Barangay 48-A Narra (Bagong Pook), Cavite City na pinangunahan ng lokal na pamahalaan bilang bahagi ng patuloy na programa nito para sa kapakanan ng mga residente.
Layunin ng naturang pasilidad na magsilbing maayos, ligtas, at disenteng lugar para sa mga pamilyang nagluluksa sa lungsod.
Sa pamamagitan ng proyektong ito, magkakaroon ng alternatibong lugar ang mga residente kung saan maaari nilang gunitain, ipagluksa, at bigyang-pugay ang kanilang mga mahal sa buhay sa isang maayos at organisadong kapaligiran.
Ayon sa pamahalaang lungsod, mahalagang magkaroon ng ganitong uri ng pasilidad lalo na para sa mga pamilyang walang sapat na espasyo sa kanilang mga tahanan upang magsagawa ng lamay.
Sa tulong ng libreng public viewing hall, mabibigyan ng pagkakataon ang mga residente na makapagdaos ng maayos na burol nang hindi na kailangan pang gumastos ng malaki sa mga pribadong punerarya o memorial chapels.
Ang gusali ay may dalawang palapag at may kabuuang walong silid na maaaring gamitin ng mga residente para sa lamay.
Dinisenyo ang bawat silid upang maging komportable at maayos para sa mga nagdadalamhating pamilya at sa mga kaanak at kaibigan na nais makiramay.
Bukod dito, inaasahan ding makatutulong ang pasilidad upang mapanatili ang kaayusan sa mga komunidad, lalo na sa mga lugar na dati ay nagkakaroon ng burol sa kalsada o sa masisikip na bahagi ng barangay.
Sa pamamagitan ng public burulan, mas magiging organisado at ligtas ang pagsasagawa ng mga lamay sa lungsod.
Samantala, sa General Trias City, binuksan din sa publiko ang General Trias Public Memorial Viewing Hall na matatagpuan sa LRTA Village, Barangay Santiago.
Ang nasabing pasilidad ay may tatlong silid at isang palikuran, na layong magbigay ng maayos, abot-kaya, at accessible na lugar para sa mga residente ng lungsod na nagluluksa.
Katulad ng sa Cavite City, inaasahang makatutulong ang viewing hall upang mabawasan ang gastusin ng mga pamilyang nangangailangan ng lugar para sa burol ng kanilang mga mahal sa buhay.
Ayon sa pamahalaang lungsod ng General Trias, bahagi ang pagtatayo ng public memorial viewing hall ng kanilang layunin na mapalawak ang mga serbisyong panlipunan para sa mga residente, lalo na sa mga panahong nangangailangan ng suporta ang mga pamilya.
Dagdag pa ng lokal na pamahalaan, ang mga ganitong proyekto ay nagpapakita ng malasakit ng pamahalaan sa bawat yugto ng buhay ng mga mamamayan mula sa kapanganakan hanggang sa huling pamamaalam.
Sa pamamagitan ng mga public viewing hall na ito, inaasahang mabibigyan ng dangal, kaayusan, at suporta ang mga pamilyang dumaraan sa panahon ng pagdadalamhati, habang pinatitibay din ang malasakit at pagkakaisa ng komunidad sa gitna ng pagkawala ng isang mahal sa buhay. ##